Nagadan sa pambabadil an broadcast journalist na si Adrian “Golden Boy” Loterte matapos siyang pabadilon kan mga dai pa nabibistong suspek sa Daraga, Albay kasuudma na hapon Lunes, Oktubre 12.
Nangyari an pambabadil sa bakery ni Loterte sa Brgy. San Roque, Daraga, kun sain bigla na sana siyang pinauranan nin bala kan saro sa duwang suspek bandang 4:10 nin hapon, bago an mga ini nagdulag na nakasakay sa sarong motor pasiring Brgy. Kimantong.
Tulos na idinalagan sa Daraga Doctors Hospital si Loterte alagad binawian man ini nin buhay bandang 5:00 nin hapon huli sa mga tama na saiyang naako.
Inatasan man kan Police Regional Office 5 an Special Investigation Task Group na mangenot sa imbestigasyon asin dakopon an mga suspek sa krimen.
Pinag-aadalan na man kan mga awtoridad an closed-circuit television footage mantang nagkokolekta nin mga pahayag hale sa mga nakasaksi sa pambabaril.
Nagkaigwa na man nin nagkapirang checkpoints sa mga kataraid na lugar.
Pig-aaram pa kan mga awtoridad an motibo sa pambabaril.
Nagsisirbing online news anchor kan RBN News Television Rabas kun Rabas si Loterte.
Katakod kaini, kinondenar kan Albay Press Club an paggadan sa mamamahayag asin nakisaro sa paghagad nin hustisya para ki Loterte sa opisyal kaining pahayag.
Nanawagan man an grupo sa Presidential Task Force on Media Security (PTFoMS) na makikabtang sa imbestigasyon kan krimen.
“We also urge the Presidential Task Force on Media Security (PTFoMS) to extend its assistance and work closely with law enforcement agencies in investigating this attack and ensuring accountability for the crime committed against a member of the media,” ani Albay Press Club President Edwin Peralta.
“Violence has no place in a civilized society. No journalist or media practitioner should have to fear for their life while performing their duty to inform the public. Attacks against media workers are not only attacks on individuals but also threats to press freedom and the public’s right to know,” dagdag pa niya.
Pig-enakaminar man kan lokal na pulisya kan Daraga an publiko na likayan an paglakop nin dai beripikadong impormasyon manungod sa krimen asin pati na an paglakop nin video o retrato kan paggadan.
