Mayu nin nahihiling na paghiro sa presyo kan kandila sapresente, base sa pag-monitor kan Department of Trade and Industry (DTI) Camarines Sur.
Sa entrevista kan Bombo Radyo Naga ki Jay Percival Ablan – Provincial Director, Department of Trade and Industry – Camarines Sur, sinabi kaini na sa mayo pang naresibeng impormasyon an ahensya manungod sa posibleng paglangkaw kan presyo kan mga kandila, dawa piglalaoman na madugangan pa an demand kaini sa panahon kan Undas.
Pig-eksplikar ni Ablan na kabale an mga kandila sa mga basic necessities asin prime commodities na regular na pigbabantayan kan DTI. An nasabing monitoring piggigibo semanal sa Ciudad nin Naga, mantang bulan-bulan sa mga lugar na nasa luwas kan Ciudad.
An presyo kan kandila pigbabantayan base sa tatak, kadakulaan asin kantidad kan laog kan pakete. Kabali sa mga brands na pigbabantayan sa merkado iyo an Liwanan, RCP Wax asin Anglo.
Dugang pa ni Ablan, nakasentro an regular na monitoring sa mga ordinaryo o basic na kandila. An mga dekorasyon na kandila, na mas mahal, saro pang konsiderasyon huli an presyo depende sa disenyo asin klase kan produkto.
Antes an selebrasyon kan Undas sa Nobyembre 1 asin 2, padagos an pagbantay kan DTI sa presyo kan mga kandila sa mga tindahan, kabale na an mga paratinda sa mga kamposanto.
Ngonian na aldaw, naglalaom an ahensya na mamantener an presyo kan kandila sa ibong kan posibleng paglangkaw kan demand durante kan Undas.
