Naglilibot na an ‘Gulong ng Karunungan’, sarong programa na ipigtao sa LGU Naga hale sa sarong bistadong convenience store, tanganing magtao nin madaling akses sa edukasyon sa hararayong lugar kan Naga City.
Sa intrevista kan Bombo Radyo Naga kay Edna San Jose, Daycare Teacher, ipigesplikar kaini na katuyuhan kan programa na madara an educare program sa mga out of school youth asin sa mga upper barangays kan Naga City, partikularmente an San Isidro, Panicuason, Carolina, asin Pacol.
Kabali sa programa an pagtukdo kan tamang pagtaram kan mga letra asin mapamilyar an mga gadgets na pwedeng gamiton sa pag-adal.
Sa presenteng datos, 28 estudyante an nagpalista sa Vistanza, alagad dikit sana an tinugutan na i-akomodar huli sa mandato kan DepEd na an mga may edad 5 years old kaipuhan nang i-enroll sa kinder.
Segun ki San Jose, kadaklan sa mga aki sa bukid bakong masyadong pamilyar sa mga modernong teknolohiya sa pag-adal.
An nasabing programa mayong enrollment fee. Kaipuhan sana na mag-atender nin sesyon an mga aki, alas 8 nin aga sagkod alas 10 para sa mga edad na 3 taon, asin alas 10 nin aga sagkod alas 12 nin udto para sa mga edad 4 na taon.
Minamawot ni San Jose na makatapos an mga aki asin mabugtakan man an kada barangay nin dugang na learning facilities, partikularmente an mga upper barangays sa Naga City.
