Aprobado na kan National Historical Commission of the Philippines (NHCP) an pagbugtak nin historical marker sa Archdiocesan Shrine and Parish of St. Joseph sa San Jose, Camarines Sur.
Inaprubahan ini kan NHCP Board of Commissioners sa regular na miting kan Setyembre 23, 2026.Pormal na bibistuhon kan marker na ini an importanteng papel kan simbahan asin parokya sa kasaysayan kan relihiyon asin komunidad sa bilog na distrito nin Partido.
Pagpaparangal man ini sa pagtubod kan mga ginikanan kan mga taga-San Jose, sa mga tawong nagtugdok asin nag-ataman sa parokya, asin sa kasaysayan na naghurma sa pagkatawo kan komunidad sa presente.
Sigon ki Mayor Jerold B. Peña, an alkalde kan banwaan nin San Jose Camarines Sur, padagos na nagsisikap an San Jose na magin sarong SMART asin GREEN na munisipalidad, sa paagi kan digital na serbisyo, mas malinig na mga sistema, asin sustenableng mga programa para sa mga paraoma asin pamilya asin padagos man na pinapahalagahan an mga pamana kan lugar.
Dagdag pa kan alkalde, an tunay na kauswagan mas natatawan nin importansya kun kabali digdi an pagpreserbar kan kasaysayan.
An San Jose, Partido, nag-aambisyon na magin sarong moderno, makakalikasan, asin mapagmalaking heritage municipality—moderno sa pagserbisyo, responsable sa pag-ataman sa kapalibutan, asin maimbod sa pag-omaw sa mga nakalihis na henerasyon.
Nagpaabot nin taos-pusong pasasalamat an lokal na komunidad sa NHCP, sa pamayo ni Chair Regalado Trota Jose Jr., asin ki Most Rev. Rex Andrew C. Alarcon, D.D., Arsobispo kan Caceres, kaiba an parish priest na si Rev. Fr. Felix Joal M. Bernales, V.Espesyal man na kinikilala an dedikasyon ni Director Kristian Sendon Cordero, na naggibo nin dakulang pagtalikod asin pananaliksik tanganing matipon asin maipresentar an kasaysayan kan parokya.
An saiyang mga pagsisikap nakatabang tanganing maisakatuparan an pagbistong ini.Nagpapasalamat man an komunidad sa gabos na miyembro kan San Jose Partido Archdiocesan Shrine of St. Joseph Heritage and History Ministry, na maimbod na nagtipon, nagpreserbar, asin nagpaabot kan kasaysayan kan lugar.
