Sa tahaw kan kakulangan sa mga classroom, gusto ni Senador Bam Aquino na mas halangkawan pa an pondo para sa Department of Education sa 2027.Segun ki Aquino, kaipuhan na ibalik sa 4 percent kan gross domestic product (GDP) o mas halangkaw pa, an pondong ilalaag kan nasyon sa edukasyon.
Sa presente, sabi niya, kulang pa an alokasyon base sa saindang pagtaya, huli sa dakul pang kaipuhan na atubangon sa sektor kan edukasyon.
Kabali digdi an nagbaba na alokasyon para sa school feeding program, asin an pangangaipuhan na pakusugon an seguridad sa mga eskwelahan.Kinuwestiyon ni Aquino an dakulang bawas sa pondo kan school feeding program, poon P27 kan 2026 pasiring sa P11 sa 2027 proposed budget.
Kaipuhan, sabi niya, na paghandaan an dugang na pangangaipuhan sa pondo huli sa suhestyon na pagpalawig kan libreng pagkakan para sa mga estudyante poon Kindergarten sagkod Grade 3, siring man an paglangkaw kan halaga kada pagkakan poon 25 pesos pasiring sa 35 pesos.
Gusto man kan senador na tutukan an mahigot na pagpapatupad sa P68-million Classroom Acceleration Program, na an katuyuhan iyo na atubangon an kakulangan sa mga classroom.
Kaipuhan man, sabi niya, na seguraduhon na sapat an pondo para sa mga programang direktang makikinabang an mga estudyante, mga paratukdo, asin sa gabos na nagsisirbi sa irarom kan sektor kan edukasyon.
