Nagsasairarom pa sa pagtugot kan Philippine National Railways (PNR) an pagimplementar kan planong drainage project, na tinatayang ₱2.4 milyon, na katuyuhan iyo an makatabang na mabawasan an pagbaha sa
Barangay Triangulo.
Sa intrevista kan Bombo Radyo Naga ki Raymund R. Arevalo, Barangay Captain kan Brgy. Triangulo, Naga City, sinaysay kaini na an proyekto nakatalaan na sakopon an parte kan Zone 4 sagkod Zone. Nilalaoman na makokonektar an nasabing drainage system sa planong drainage infrastructure kan gobyerno kan syudad sa maabot na panahon.
Segun ki Arevalo, an pagbaha saro sa mga pangenot na problema kan saindang barangay, partikular sa lugar kan Triangulo, kun sain magkakadukot an mga harong asin limitado an daloy kan tubig.
Bagama’t igwa nang nakapreparar na Program of Works (POW) hale sa City Engineering Office asin aprubado na an nakalaag na badyet, dai pa maipapatupad an proyekto sagkod na mayo nin pagtugot hale sa PNR.
An pamayo kan barangay nagsumite na nin pormal na surat sa PNR tanganing maghagad nin pagtugot asin naghahalat pa man giraray an pamayo kan barangay nin simbag hale sa nasabing ahensya.
Huli sa pagkaantala, iminungkahi man an posibilidad na ibalyo o i-realign an pondo sa iba pang proyektong posibleng agarang makatabang sa mga residenteng pirimg nakakaeksperyensiya nin pagbaha.
Alagad, naglalaom pa man giraray an barangay na aaprubahan kan PNR an orihinal na kahagadan tanganing maipatupad an proyekto na nakatalaan na makinabang an mga residente kan Triangulo.
Mientrastanto, importante an regular na paglinig asin pagmantener kan mga drainage tanganing malikayan an pagbara na pwedeng magpalala sa pagbaha, orog na kun igwa nin makusog na uran o bagyo.
