Nagrekord an Manila nin 2,692 kaso nin influenza-like illness poon Enero sagkod ngunyan na bulan, base sa pang-aldaw-aldaw na report kan Water-borne, food-borne, and Leptospirosis Diseases sa siyudad.
Sa pinakabagong bilang, siyam an bagong kaso kan nasabing helang. Base man sa datos kan siyudad, nadugangan nin walo an bagong kaso nin dengue asin pitong bagong kaso nin Severe Acute Respiratory Infection (SARI).
Segun sa Department of Health (DOH), naglangkaw sa 8% an kaso kan flu-like illnesses, kaya magsasagibo nin pagbabakuna ngunyan na Linggo, pahayag ni Health Secretary Edwin Mercado.
Base sa World Health Organization (WHO), an influenza-like illness sarong clinical syndrome na may mga sintomas arog kan kalentura, ubo, asin pwedeng kawsa man kan nagkapirang pathogens o mikrobyo arog kan bacteria, fungi, asin parasites.
Segun sa DOH, an respiratory droplets hale sa pag-ubo, paghatsing, asin haraning kontak sa mga kontaminadong lugar pwedeng makakontribwir sa paglakop kan respiratory infections.
Dakulang rason man an malipot na panahon asin an pagtiripon-tipon kan mga tawo durante kan holiday season.
Ipinaabot kan Department of Health (DOH) na sisimulan na ngunyan na semana an pagwaras nin mga bakuna kontra trangkaso o influenza, asin uunahon an vulnerable sectors.
