Nagkapirang mga junk shops sa Ciudad nin Naga an pigsarado huli ta mayo nin kinakaipuhan na business o mayor’s permits, katakod kan implementasyon kan lokal na ordinansa na nagreregular kan operasyon kan mga junk shops sa ciudad.
Sa entrevista kan Bombo Radyo Naga ki Atty. Noreen San Luis, City Administrator, sinabi kaini na an lakdang basado sa City Ordinance No. 2008-056, na ipinasar kan 2008 asin nakatalaan kan mga lugar asin rekisitos na dapat sunudon kan mga junk shop antes sinda tugotan na mag-operate.
An mga kagsadiri nin junk shop tinawan suboot nin pagkakataon na makipag-olay sa city government asin asikasohon an saindang mga permit makalihis an sarong dayalogo. May mga nanuga na masunod sa mga itinalaan na mga susundon.
Sa ibong kaini, nanindugan an opisyal na dapat magsunod an gabos na negosyo sa pagkua nin mayor’s permit asin business permit. Kun mayo sinda kan mga kinakaipuhan na dokumento, pwede sindang isara susog sa eksistidong ordinansa.
Mientrastanto, nagpapadagos man an paglibot kan City Treasurer’s Office ngani na inspeksyunan an iba pang mga establisimiento na posibleng nag-ooperar na mayong permit.
Apwera sa pagsierto na kompleto an mga dokumento, pwede man magkondusir nin regular na inspeksyon an lokal na gobyerno tanganing maaraman kun igwa nin mga junk shop na imbuelto sa pagbakal nin mga hinabon na gamit o iba pang iligal na aktibidad, susog sa Anti-Fencing Law.
