Naka-alerto asin andam an Naga City Operatives for Basic Rescue of Wild Animals (NCOBRWA) na magresponde nin 24 oras kada aldaw sa mga bareta dapit sa presensya nin mga layas na hayop, partikular na an mga halas, sa mga harong asin komunidad sa Ciudad nin Naga.
Sa intrevista kan Bombo Radyo Naga ki Raymundo Dela Cruz, Naga City Operatives for Basic Rescue of Wild Animals-Team Leader, sinabi kaini na primerong katungdan ninda iyo an mag-rescue asin ligtas na madakop an mga halas na nahihiling sa mga residensyal na lugar ngani na maibitaran an posibleng peligro sa mga residente siring man sa mga hayop mismo.
Kabali sa mga halas na pigtututukan ninda iyo an Philippine Cobra na bisto sa kakayahan kaini na magluwa nin hilo na suboot pwedeng mag-abot nin tolong metros. Ipinaliwanag ni Dela Cruz na an mata kan sarong tawo pwedeng madanyaran kun tamaan kan hilo kaini, kaya importanteng maaraman an tamang lakdang na dapat gibohon kun makasabat nin kobra.
Pigtawan-duon man niya na bako gabos na halas natural na agresibo sa mga tawo. Kadaklan na beses, mas gusto nindang maglikay asin magdulag imbes na makipag-atubang sa mga tawo.
An iba pang klase nin halas na makukua sa Ciudad nin Naga iyo an reticulated python, rat snake, asin cobra. Sarong reticulated python man an naitala sa Barangay Santa Cruz na sampulong piye an laba asin may gabat na walong kilo.
Sa rason na ini, nangangapudan an grupo sa publiko na dae magdulok, magdakop, o magdanyar sa mga halas na makukua sa saindang palibot. Imbes, tulos na ipaaram sa saindang grupo tanganing maseguro an ligtas na pagresponde asin pagsalbar.
Padagos an pag-engganyar kan NCOBRWA sa mga residente na mag-ingat asin magkooperar sa pagprotehir kan mga layas na hayop para maibitaran an mga aksidente asin mamantenir an kaligtasan kan lambang komunidad.
