Ipinagsugo kan lider kan North Korea na si Kim Jong Un kan marikas na pagpahiwas kan teknolohiya nin drone kan nasyon asin an pagtesting kan manlaen-laen na armas. Sinabi kan media kan estado na an lakdang may katuyuhan na mapakusog an kakayahan militar kan North Korea sa tahaw kan tensyon sa South Korea.
Idinoon ni Kim an importansya kan pagpatalubo nin mas dakulang kakayahan sa produksyon asin paggamit nin mga drone, kaiba an mga kagamitan sa pakikipaglaban. Sinabi kan mga eksperto na an mga soldados kan North Korea na ipinadara sa Rusya tanganing magtabang sa gera sa Ukraine tibaad nagkaigwa nin eksperyensya sa pakikilaban nin mga drone.
An media kan estado kan North Korea nagbareta man na an nasyon nagkondusir nin mga pag-eksamin sa manlaen-laen na drone, missile asin rocket launcher. Mientras tanto, sinabi kan militar kan South Korea na namonitor ninda an paglansar kan mga 10 short-range ballistic missiles hale sa Wonsan, North Korea.
Naggrabe an tensyon sa pagultanan kan duwang Korea makalihis na magputok an mga landmine sa saindang linderos, na irido kan tolong suldados kan South Korea. Pinahimutikan kan Pyongyang an responsibilidad asin naghuma nin pagbalos kun maprobokar an nasyon.
Mientrastanto, padagos na pinapakusog ni Kim an relasyon kan North Korea sa Chiina asin Russia. An Swiss Foreign Minister na si Ignazio Cassis nag-abot man sa Pyongyang tanganing masaksihan an pagbukas giraray kan Swiss diplomatic mission asin makipag-ulay sa mga opisyal kan North Korea.
