Nasa labi 45,000 pasahero an nairehistro kan Coast Guard District Bicol sa mga pantalan sa bilog na rehiyon poon kan Oktubre 29 ngunyan na panahon kan Undas.
Segun ki Public Information Officer Lt. Jr. Grade Allysa Novie Bermal, nakarehistro sinda nin 25,873 outbound passengers asin 19,945 inbound passengers sa saindang hurisdiksyon.
Mas dakol an nairehistrong pasaherong papaluwas huli ta an rehiyon kan Bicol an pangenot na exit gateway pasiring Visayas hale sa Southern Luzon.
Siniguro kan kawanihan na mayong nairehistrong major accidents sa gabos na minomonitor na pantalan huli sa higot na pagpautob kan mga security protocol asin safety measures.
Nag-deploy an PCG nin 563 personahe kaiba an 589 miyembro kan Deployable Response Group tanganing magbantay man sa mga beach areas asin tourist destinations.
Piglalaoman an giraray na paglangkaw kan passenger volume pasiring Maynila kaya pinagiromdom kan PCG sa publiko na magtangkilik sana sa mga lehitimo asin awtorisadong sasakyang pandagat.
