Ipigturing kan Bureau of Fire Protection (BFP) na generally peaceful an pagselebrar kan Undas 2026 sa Naga City, matapos na mayu nin nairehistro seryosong insidente sa isinagibong Oplan Kaluluwa asin Oplan Undas.
Sa intrevista kan Bombo Radyo Naga ki FCINSP Joshephine Jeanette C Barandon, OPFM Caretaker / City Fire Marshal, Naga City, sinabi kaini na nag-deploy nin mga personnel an ahensya sa nagkapirang sementeryo sa syudad, kabali na an Concepcion Pequeña, Peñafrancia Cemetery, Eternal Gardens asin Sto. Niño Memorial Park.
Nagsagibo man an BFP nin rotation o shifting kan mga personnel, na may kabilugang tulong shift, kalakip an naka-standby na ambulance asin fire truck para sa posibleng emergency.
Mantang may mga tawo pang nagbibisita sa mga sementeryo, padagos man na naka-alerto an mga personnel kan BFP asin magpapadagos an deployment sa hapon.
Mientrastanto, nagtao nin pahiling si Barandon sa publiko na magin maingat sa paggamit nin kandila sa mga sementeryo. An mga kandila na iniiwang nakasindi, partikular kun harani sa mga bagay na madaling masunog, posibleng paggikanan nin kasulo.
Pinagigirumdom man sa publiko na dai mag-apon nin nagkakalayo na sigarilyo, asin dai magsulo nin basura o mga pinutol na sanga nin kahoy.
Bago man maghale sa harong, pinapayuhan an mga residente na siguraduhon na naka-off an gabos na appliances, nakasara an kalan asin tangke nin LPG, asin nakasarado nin tama an mga pinto asin bintana para sa kaligtasan asin seguridad.
Padagos an pagbabantay kan BFP sa mga sementeryo bilang parte kan kampanya na masiguro an kaligtasan kan publiko sa selebrasyon kan Undas 2026
