Nagin matuninong asin areglado an selebrasyon kan Undas sa probinsya nin Camarines Norte, na mayong bagong cybercrime incidents may relasyon sa Undas na nairehistro, segun sa Camarines Norte Provincial Cyber firesponse Team.
Sa intrevista kan Bombo Radyo Naga ki Police Staff Sergeant Ada Yaba, focal person kan Camarines Norte Provincial Cyber firesponse Team, sinaysay kaini na duwang insidente sana an naireport sa saindang opisina, alagad dae man nangyari kan panahon mismo kan Undas asin Nobyembre 2 pa sana an naireport.
Segun ki Yaba, mayo man sindang naresibeng reklamo manungod sa mga pekeng online booking, bogus accommodation offers, pekeng online selling, pekeng travel booking asin mga pandadaya na online solicitations sa nasabing okasyon.
Bilang preparasyon, an Camarines Norte Police Provincial Office nagkondusir nin coordination asin planning sa mga local police station asin iba pang support unit tolong aldaw antes an Undas. Kabale sa saindang mga lakdang iyo an cyber patrolling asin pagmonitor sa social media para maibitaran an mga posibleng krimen.
