Nagtalaga an militar kan United States nin 20-miyembrong task force na magtutukdo nin mga paagi tanganing mapugulan an mga ruta sa kalupaan na ginagamit sa pagpasok nin mga armas asin iba pang ilegal na materyales sa Iran.
Segun sa US Central Command (CENTCOM), an grupo na binubuo nin mga sibilyan asin tauhan militar, na nakabase sa Florida, makikipagtabangan sa iba pang ahensya kan gobyerno kan US tanganing pigilan an pagbiyahe nin mga advanced weapons systems, teknolohiya, mga materyales na sakop kan sanctions, asin ilegal na pinagkakakitaan sa mga border kan Iran asin sa Caspian Sea.
Segun ki CENTCOM Chief Brad Cooper, an lakdang ini naglalayong limitahan an kakayahan kan Iran na pondohan an terorismo, magpatindog giraray nin mga pabrika nin armas, asin magdugang nin suplay para sa saindang militar.
An nasabing plano dagdag sa naval blockade kan US sa mga pantalan kan Iran, sa tahaw kan nagdadanay na girra kan duwang nasyon na nag-aabot na sa walo na bulan.
Ibinahagi man kan CENTCOM na napugulan na kan naval blockade an Iran na makapagluwas nin sobra sa 25 bilyong dolyar na krudo.
Mantang, nagreaksyon an Islamic Revolutionary Guard Corps kan Iran asin sinabing mabibigo an bagong hakbang kan Washington na magdulot nin pagbagsak kan ekonomiya kan saindang bansa.
Segun sa tagapagsalita kaini na si Hossein Mohebi, dai magigin epektibo an mga plano kan US na magpataw nin grabeng presyur sa ekonomiya kan Iran, asin dai man mapupugulan an komunikasyon kaini sa mga karatig-bansa.
An tensyon sa rehiyon naglalaom pang magpadagos, kasunod kan pagharang kan Iran sa Strait of Hormuz, sarong mahalagang ruta nin kalakalan nin enerhiya sa bilog na kinaban.
