Labing 40 na pilot whales an nairehistrong nagadan matapos ma-stranded sa sarong pampang sa New Zealand kan Huwebes
Namasdan an grupo kan mga pilot whales sa Ngawi coast harani sa Cape Palliser sa North Island, New Zealand, susog sa pahayag kan Department of Conservation (DOC) kan nasyon.
Sa inisyal na report kan Project Jonah New Zealand, sarong environmental organization, labi 20 na balyena an enot na na-stranded sa pampang kun sain buhay pa an apat sa mga ini.
Dugang pa kan organisasyon, nakikipag-ugnayan na ini sa mga ahensya kan gobyerno kan New Zealand, kaiba an lokal na tribo kan Māori, tanganing magsagibo nin pagsalbar sa buhay pang mga balyena sa pampang asin pag-eksamin sa saindang salud.
Alagad sa nakaaging Biyernes, nadiskubre kan DOC an 43 na gadan na balyena sa sarong kilometrong laba kan baybayon nin Ngawi sagkod sa baybayon nin Mangatoetoe.
Base sa DOC, parati na-stranded sa pampang an nasabing klase nin balyena alagad dae pa malinaw an tunay na kawsa kaini.
