Pigseguro ni House Prosecutor Rep. Terry Ridon na andam na an bilog na House Prosecution Panel na magsagibo nin cross-examination sa gabos na testigo na ipepresentar kan depensa sa pagpadagos kan impeachment trial ni Vice President Sara Duterte ngunyan na aldaw, Nobyembre 9, 2026.
Segun ki Ridon, kaipuhan na ipaliwanag kan kampo kan Bise Presidente an sinasabing P800 milyon sagkod P1.5 bilyon na dai maipaliwanag na yaman, kaiba an labi sa P100 milyon na laog kan mga financial account na dai nakalista sa saiyang Statement of Assets, Liabilities and Net Worth (SALN).
Gusto man linawon kan prosekusyon an labi sa P200,000 na credit card transactions na ginamit sa pagkakan sa luwas asin pagbakal nin sapatos, alagad naghabo si Ridon na ihayag kun siisay sa saindang lado an partikular na magko-cross examine sa mga testigo.
Tinawan-duon pa kan mambabatas na dai pwedeng isisi kan Bise Presidente sa saiyang mga staff an mga sala sa saiyang SALN huli ta bilang sarong abogado, aram niya an legal na epekto kan pagpirma sa sarong notarized document manungod sa P817.87 milyon na tinatantyang unexplained wealth ninda kan saiyang agom na si Atty. Manases Carpio.
Mientrastanto, ipinahayag ni prosecution legal spokesperson Atty. Benjamin Tolosa Jr. na andam an gabos na public asin private prosecutors para sa paglilitis, mantang idinugang na mas marhay kun mismong an Bise Presidente an humarap bilang testigo tanganing ilahad an katotoohan laban sa mga alegasyon na saiyang pigpapahimutikan.
