Mahigot na nagpatanid an Department of Energy sa mga oil companies kontra sa pag-implementar kan “pautay-utay” o staggered large-scale rollback na mapuon saaga, Nobyembre 10.
Susog sa liderato kan ahensya, an arin man na kumpanya na dai magsunod sa direktiba pwedeng mag-atubang nin show-cause order asin lubos na inspeksyon.
Ini may koneksyon sa dakulang pagbawas sa presyo kan mga produktong petrolyo, na maabot sa P16.80 cada litro sa gasolina, P4.10 sa diesel, asin P3.70 sa kerosene.
Pigpaliwanag kan DOE na direktang resulta kan pagbaba kan presyo kan petrolyo sa internasyunal na merkado an dakulang pagbawas sa presyo nin huli sa pagluya kan tensyon sa pagultanan kan Estados Unidos asin Iran.
Madoon na nanindugan si DOE Undersecretary Alessandro Sales na dae tinutugutan an phased reduction huli ta mandato ini kan ahensya mantang yaon pa an state of calamity huli sa nagpapadagos na tensyon sa Middle East.
Segun sa opisyal, usually nangyayari an phased system sa oras na maglangkaw an presyo kan gasolina asin bako sa mga panahon na may dakulang pagbawas.
Pigsierto man kaini na bukas asin transparent an computation kan ahensya sa ibong kan pagkwestyon kan nagkapirang oil firms, asin nanindugan na dae nanggad nagbago an saindang basehan sa pagkwenta.
