Ligtas ang lahat ng 17 Pilipinong marino na sakay ng barkong Atlantic Asphalt, na may bandila ng Marshall Islands, matapos itong bumangga sa isang nakadaong na river cruise boat sa Louisiana, Estados Unidos, ayon sa anunsyo ng Department of Migrant Workers (DMW) nitong nakaraang Linggo, Nobyembre 15.

Nangyari ang insidente nang bumangga ang tanker sa riverboat na American Heritage, na mahigit dalawang oras nang nakadaong sa Ilog Mississippi sa New Orleans.

Ayon kay Migrant Workers Secretary Hans Leo Cacdac, walang naiulat na Pilipinong manggagawa na sakay ng riverboat, habang ligtas din ang lahat ng 17 Pilipinong marino na sakay ng tanker.

Sinabi ni Cacdac sa isang press briefing sa International Media Center, kasabay ng ika-49 na ASEAN Summit sa Maynila nitong nakaraang Linggo, na nakikipag-ugnayan na ang DMW sa Embahada at Konsulado ng Pilipinas sa Estados Unidos, gayundin sa lisensiyadong manning agency sa bansa, upang matiyak ang ligtas na pag-uwi ng mga marino.

Advertisement

Tiniyak din ng kalihim na magbibigay ang gobyerno ng kinakailangang tulong sa mga Pilipinong marino, alinsunod sa direktiba ng Pangulo.

Samantala, walang naiulat na nasawi o kritikal na nasugatan sa insidente. Aabot naman sa 32 katao ang isinugod sa mga lokal na ospital matapos ang banggaan.

Advertisement