Pinuna ni Bise Presidente Sara Duterte ang hepe ng Philippine National Police (PNP) kaugnay ng pahayag nitong nananatiling “apolitical” o walang kinikilingang pulitika ang pambansang pulisya, at iginiit na nagsisilbi na umano ang institusyon bilang tagapagpatupad ng mga politiko.Balitang Pilipinas

Sa isang opisyal na pahayag na inilabas ng Office of the Vice President (OVP) nitong Nobyembre 21, 2026, binatikos ni Duterte ang agarang deklarasyon ng PNP Chief na walang naganap na “rescue” sa kabila ng kawalan ng masusing imbestigasyon.

Ayon sa Bise Presidente, hindi man lang siya o ang iba pang sangkot hiningan ng salaysay tungkol sa pangyayari, na aniya’y naglalagay sa alanganin sa pagiging patas at pagsunod ng pulisya sa due process.

Kasabay nito, ibinunyag ni Duterte na hawak ng kanyang kampo ang hindi bababa sa limang dokumentadong banta na nagmula umano sa ilang tauhan ng PNP laban sa kanya, sa mga kawani ng OVP, at sa kanyang sariling pamilya.

Advertisement

Iginiit niyang hindi ito simpleng haka-haka o akusasyong politikal, ngunit wala umano silang mapagdulugan upang makahingi ng tulong.

Sinabi rin ng Bise Presidente na maaaring hindi na niya maiharap ang mga nasabing ebidensya sa impeachment proceedings matapos umanong bawiin ng prosekusyon ang reklamong grave threats laban sa kanya, isang hakbang na tinawag niyang may malisya dahil wala umano itong sapat na batayan sa katotohanan at batas.

Dagdag pa ni Duterte, ang kanyang pahayag na hindi siya nakararamdam ng kaligtasan sa bansa ay sumasalamin din sa pangamba ng maraming ordinaryong Pilipino na hindi napoprotektahan ang kanilang mga pangunahing karapatan.

Hinimok niya ang hepe ng PNP na sa halip na ipagtanggol ang mga nasa kapangyarihan, ay pagtuunan ng pansin ang tungkuling tiyakin na pantay na ipinagtatanggol ng batas ang bawat mamamayan.

Wala pa namang tugon ngayon ang pulisya sa alegasyon ng bise presidente.

Advertisement