Nag-abot na sa 30 lugar an apektado kan ashfall o abo gikan sa pagsabog kan bulkang kanlaon sa Negros Island base sa datos gikan sa Department of Environmental and Natural Resources (DENR).
Sigun sa DENR – Environmental Management Bureau (EMB) Western Visayas, nairekord an ashfall sa Negros Occidental partikularmente sa La Castellana, La Carlota City, Bago City, Murcia, Pontevedra, San Enrique, Hinigran, Valladolid, Pulupandan asin Moises Padilla.
Apektado man an mga lugar sa Guimaras patikular na sa Nueva Valencia, Sibunag, San Lorenzo asin Jordan.
Siring man sa Iloilo, orog na sa Iloilo City, Pavia, Oton, Tigbauan, Igbaras, Guimbal, Miag-ao asin San Joaquin asin 7 pang mga lugar sa Antique.
Katakod kaini, nagtaong-abiso man an EMB Western Visayas sa mga apektadong residente na pwedeng magresulta sa respiratory problems an pagkakalantad sa ashfall siring kan iritasyon sa mata, kublit asin injury.
Dapat soboot na limitaran muna an mga outdoor activities partikularmente na sa mga kaakian, mga gurang asin igwang respirotry issues.
Pig-aabisuhan man an mga apektadong residente na magsulot nin N95 mask asin goggles kun kinakaipuhan talagang magluwas asin magsulot nin igwang halabang manggas tanganing maproteksiyonan an kublit.
