Nagkondusir an Armed Forces of the Philippines (AFP) nin sarong regular na maritime patrol harani sa Bajo de Masinloc sa West Philippine Sea kan Oktubre 15. Katuyuhan kaini na mapagdanay an presensya kan nasyon asin maprotektaran an mga karapatan kaini sa kadagatan.
Pinangenotan an operasyon kan Northern Luzon Command, gamit an BRP Miguel Malvar, kaiba an sarong Philippine Navy helicopter. Parte man ini kan ika-16 na Bilateral Maritime Cooperative Activity kan Pilipinas asin United States, na kinabibilangan kan USS Warrior asin BRP Melchora Aquino kan Philippine Coast Guard.
Segun sa AFP, an katuyuhan kan pinagsarong aktibidad iyo na patibayon an defense cooperation, maritime capabilities, asin koordinasyon kan duwang nasyon. Nagsagibo man an mga partisipanteng pwersa nin passing honors asin photo exercise.
Namasdan kan Philippine Navy an duwang Chinese naval vessel asin sarong China Coast Guard vessel harani sa Bajo de Masinloc. Sarong barkong pandigma kan China an nagrani sa BRP Miguel Malvar, mantang sarong Chinese military helicopter an nagsunod sa Philippine Navy aircraft.
Ni-report kan AFP na mayo nin ipinahiling na agresibong hiro an barkong pandigma asin mayo man nin bagong estrukturang namasdan sa lugar.
