Kinumpirmar kan kampo kan Korean superstar na si Lee Seung Gi na expecting na liwat sinda kan saindang agom na si Lee Da In sa saindang ikaduwang aki.
Basado sa anunsiyo kan talent agency kan aktor na Big Planet Made, nasa ikalimang bulan na kan saiyang pregnancy an aktres.
Maogmang ipigheras kan ahensiya an bareta na maikokonsiderar na marekas na nasundan, kun saen marurumdumang kan nakalihis na Pebrero 2024 iminundad kan mag-agom an saindang matuang aki.
Kun bebweltadahan, ikinasal an celebrity couple kan nakalihis na Abril 2023, duwang bulan makalihis an saindang engagement.
Enot nindang isinapubliko an saindang relasyon kan taong-2021.
Sikat sa mga Pilipino si Seung Gi huli sa saiyang mga hit K-drama siring kan My Girlfriend is a Gumiho asin Shining Inheritance, mantang nabistado man si Da In sa seryeng Alice asin Hwarang.
