NAGA CITY- Dakulan an pasasalamat kan alkalde kan banwaan nin Pili, Camarines Sur makalihis na ideklarar ni Presidente Ferdinand Bongbong Marcos Jr na non-working holiday an Cimarrones Festival.
Sa entrevista kan Bombo Radyo Naga ki Pili Mayor Tom Bongalonta, sinaysay kaini na naghagad soboot sinda nin special holiday sa Presidente sa paagi ni Executive Sec. Lucas Bersamin para sa pagselebrar kan saindang kafiestahan.
An nasambitan man na kahagadan an pig-grant kan Punong Ehekutibo kun kaya an bilog na Pili an mayong trabaho o laog sa klase kasabay kan selebrasyon.
An pagtugot ni Presidente Marcos Jr an nagtao man nin dakulang kaogmahan para sa saindang mga residentes nin huli ta makakabwelo an mga ini sa pagselebrar kan Cimarrones Festival na sarong cultural asin religious festival sa banwaan kan Pili.
Sa ngunyan, hagad na sana ni Bongalonta na magin matrayumpo an nasambitan ng selebrasyon asin makisumaro an gabos sa kaogmahan.
