Kaipuhanan na suboot ayuson an integridad kan Senado makalihis an masarong bulan na kaguluhan kaini.
Sa naging intrevista kan Bombo Radyo Naga kay Duterte Panagutin Network Convenor Atty. Jojo Lacanilao, ini an dapat na gibuhon kan halangkaw na katipunan sa tahaw kan pagbabago kaini sa liderato. Digdi pigtawan-doon niya na pilay an satuyang gobyerno nin huli ta may saro sa duwang kamara kan Kongreso an dai naggagana ta dai ini makapagpasar nin mga ley.
Kan haputon ini manungod sa sistema kan Senado sa irarom ni Senador Sherwin Gatchalian komo Senate President, nahihiling ni Lacanilao na nagkaigwa suboot nin diit na stability asin nagpoporbar na an mga lehislador na maibalik na kaini an normal na operasyon arog kan pagkondusir nin mga sesyon. Alagad dai pa suboot kaini masasabi na tapos na an kaguluhan.
Iyan an nangyari kan ribayan ni Gatchalian si Senador Alan Peter Cayetano sa nasambitang posisyon, na kun sain nanotaran ang pagpartisipar kan nagkapirang miyembro kan bagong mayorya makalihis an sarong special session ngonian na Hunyo 17.
Nanotaran an pag-atendir sa nasambitang sesyon ninda Senadora Loren Legarda, Senadora Pia Cayetano, Senator Imee Marcos, Bong Go, asin Camille Villar mantang mayo man sa attendance an dating senate president.
Naobserbahan man kan publiko na imbes mag-atendir kan mga sesyon, yaon si Cayetano sa saiyang Facebook Live na magkaibong an pambabatikos sa nagkapira niyang kaibanan hali sa bagong Majority bloc.
Kinumentuhan ini ni Lacanilao na dai pa nakaka-move on si Cayetano nin huli ta dai suboot kaini aram ang hangganan kung nuarin siya mapuntok. Segun saiya, bagay ini kun sain nararaot an ladawan kan senador dawa pa ano an saiyang pinaninindogan.
Dugang pa kan abogado, an asta kan senador iyo an maresulta kan saiyang self-destruction mantang nahihiling siya kan publiko na garo bitter, megalomaniac o grabe an obsesyon sa urulayan nin poder na mapadagos siring sa saiyang ladawan komo sarong petty, immature asin dai tatao mag-ako nin kadaugan.
An mga bagay na ini nagiginibo man suboot ni Cayetano sa pagtubod na dakulon pa ining mga taga-suporta. Huli digdi, ipigrekomenda ni Lacanilao na igwang poder an Senado na disiplinahon an saindang ka-miyembro arog ni Cayetano kun dai ini mapundo sa saiyang gawi na arog suboot sa ginibo kan Kamara de Representantes kay dating Rep. Kiko Barzaga. Alagad nin huli ta masakit man suboot makua an bastanteng boto ta nganing madisiplina an senador, huna ni Lacanilao na nagpapadagos ini ta pig-iisip kaini na mayong konsekwensya an saiyang ginigibo.
Pangapodan man kan Duterte Panagutin Network convenor na kaipuhan na ayuson an Senado nin huli ta nahihilingan ini nin labot kan nagkapirang heneral na muyang ribayan an gobyerno sa daing demokratikong paraan—bagay na makakaraot sa katuninungan asin makaag suboot kan demokrasya sa peligro.
