NAGA CITY- Pigtugutan kan alkalde kan Sagnay na makapag hingalo na an mga otoridad sa saindang banwaan huli man sa nagin pag antabay kan mga ini sa mga evacuees kan nakalihis na super typhoon Pepito.
Sa nagin entrevista kan Bombo Radyo Naga ki NOLI PIELAGO- MDRRMO OFFICER SANGAY, pigsaysay kaini na maski papano nakaraos-raos naman an kamugtakan kan nasambitan ng banwaan sa presente makalihis kan panlamasa kan raot nin panahon.
Labi man an kaugmahan kaini na dae soboot nakarehistro nin ano man na casualty.
Kan subago man na aga sana man naihatod pa sana su mga nag ebakwar na nakaistrar sa mga harani sa salog huli man sa pig assess pa kun marahay na kamugtakan kan level nin tubig.
Nakapag sagibo naman soboot nin marekas na clearing ops huli man sa dae man gayo an nagin epekto na pigwalat kan bagyong Pepito.
Dugang pa kan opisyal, nagsugo naman an alkalde kan banwaan nin Sagnay na si Mayor Jovi Fuentebella dapit sa paglinig kan mga pasilidad na ginamit komo evacuation centers siring kan mga eskwelahan.
Katakod digde, nakabaralik naman an mga residenteng nag ebakwar na nasa poco mas o menos 3,000.
Pigsaysay pa man ni Pielago na ngunyan na aldaw masagibo sinda nin consolidation manungod man sa mga naikurit na naraot na mga harong sa bilog na banwaan.
Mientrastanto, masasabi man ni Pielago na dakulang tabang an pagsagibo nin dakulang preparasyon antes pa man na pag dangadang kan bagyo asin na abisuhan tulos an mga reidentes orog pa man su mga yaraon sa low lying areas dapit sa saindang pag ebakwar
