Nag-apelar an Office of the Prosecutor kan International Criminal Court (ICC) sa Appeals Chamber na sayumahan an apelar kan kampo ni dating Presidente Rodrigo Duterte para sa saiyang paramientras na pagpalibre.
Sigun sa Prosecution, bigo an depensa na patunayan na igwang legal o factual na sala sa desisyon kan korte dapit sa padagos na pagkakakulong ni Duterte.
Marurumduman na pigsayumahan kan Pre-Trial Chamber I an kahagadan ni Duterte para sa paramientras pagpalibre kan Setyembre 26 sa irarom kan Article 60(2) kan Rome Statute, asin pigsugo an saiyang padagos na detensyon.
Natukdo man kan Korte na igwang tolong makatuwirang rason para sa saiyang padagos na pagkakakulong kaibahan digde na masierto an saiyang paghahampang sa paglilitis; masierto na dae kaini mabubugtak sa peligro an imbestigasyon o mga proseso kan korte; asin masierto na dae kaini ipapadagos an paggibo nin mga krimen.
Sigun sa Prosecution, an mga kontak asin network kan suporta ni Duterte sa pulitika, kaibahan si Vice President Sara Duterte, asin an saiyang pagka-elihir komo alkalde kan Davao, pigbisto komo mga halimbawa kan padagos na impluwensya.
Mantang pigbibisto na an salud kan sarong detenido na pwede makaimpluwensya sa pagdedesiyon kan hukuman, pigsambit kan Prosekusyon na naaraman kan Chamber na dae napatotoohan kan depensa kun paano nakakadanyar an detensyon sa salud ni Duterte tanganing tawan-katwiran an saiyang pagpapalibre.
Si Duterte, 80, nakakulong sa Hague Penitentiary Institution o Scheveningen Prison asin nahahampang sa mga kaso kan crimes against humanity huli soboot extrajudicial killings kan mga pinagtutubudang tulak asin naggamit nin droga sa irarom kan saiyang war on drugs kan saiyang termino.
