Kinumpirmar kan Department of Foreign Affairs (DFA) na an gabos na mga pamayo kan estado kan mga nasyon na miyembro kan Association of Southeast Asian Nations (ASEAN) maatendir sa ASEAN Summit 2026 sa Cebu, apwera sa lider kan Myanmar.
Segun ki DFA Assistant Secretary asin ASEAN spokesperson na si Dominic Xavier Imperial, dae maatender an bagong lider kan Myanmar kundi mga representante sana kan saindang Ministry of Foreign Affairs.
Imbes, ipapadara kan Myanmar an Permanenteng Sekretaryo kan foreign ministry asin an representante sa Senior Officials’ Meeting (SOM).
Si Min Aung Hlaing dati nang naelihir bilang presidente kan Myanmar sa paagi nin sarong pagboto sa parlamento kan Abril, pagkatapos na siya mag-itaas sa poder kasunod kan sarong kudeta kan 2021 na nagpatalsik sa gobyerno ni Aung San Suu Kyi.
Susog sa Imperial, an desisyon kan mga lider kan ASEAN na limitaran an representasyon kan Myanmar sa mga nakaaging summit nagdadanay huli sa padagos na krisis sa nasyon.
Dugang pa kaini, mantenidong epektibo an naenot na desisyon na an representasyon kan Myanmar limitado sana sa lebel kan SOM leader asin Permanent Secretary.
Mientrastanto, sinabi man kan opisyal na dae pa man nagkakaoroyon an ASEAN kun rerekognisar an nakaaging pirilian sa Myanmar.
Padagos man na pigbabantayan kan bloke an implementasyon kan limang puntong pinagkaoroyonan na naghahagad para sa pagtapos kan kadahasan asin pagpadara nin humanitarian aid sa Myanmar.
An ASEAN binibilog kan mga nasyon arog kan Filipinas, Brunei, Cambodia, Indonesya, Laos, Malaysia, Singapore, Thailand, Timor-Leste, Vietnam, asin Myanmar.
