NAGA CITY- Padagos pa suboot na namamatean an pagbagsak nin abo hale sa Mt. Mayon sa banwaan nin Oas sa probinsya nin Albay .
Ini an kinumpirmar ni PC/Insp. Virgil Vibat, hepe kan PNP Oas sa entrevista kan Bombo Radyo Naga.
Sigon ki Vibat, subanggi pa nagpuon an pagbagsak nin abo sa saindang banwaan huli naman sa padagos na pag-a-alburoto kan bulkan kaya man nanao na sinda nin mga face mask sa mga residente na naaaag-iistar sa barangay Poblacion na labing apektado kan ash fall.
Dawa na mayong mga barangay sa Oas an yaon sa laog kan permanent danger zone kan Mt. Mayon, sinaysay ni Vibat na padagos an ginigibong monitoring kan saindang opisina katabang an lokal na gobyerno asin Municipal Disaster Risk Reduction and Management Office (MDRRMO) sa kamugtakan kan nasambitang bulkan.
Dugang pa ki Vibat, namumuti na an kolor kan mga bihikulo sa saindang lugar dara naman kan abo na padagos na pigbabagsak kan Mt. Mayon.
Napag-araman na labing apektado kan nangyaring ash fall an mga banwaan nin Oas, Polangui asin an ciudad nin Ligao.
Sa suway man na entrevista ki Lt. Col. Patrick Cinco, battalion commander kan CMO Battalion kan 9th Infantry Division, Philippine Army, sinaysay kaini na pighahalat pa ninda an abiso hale sa Office of the Civil Defense (OCD) Bicol sa kun saeng mga lugar ide-deploy an mga soldados na miyembro kan Task Force Mayon katakod kan pagtataas kan Philippine Institute of Volcanology and Seismology (PHIVOLCS) sa Alert Level 4 kan bulkang Mayon ngonyan na hapon.
