Aram baya nindo mga kaBombo, sarong Australian high school teacher naging sentro kan pag urulay ngunyan kan mga magurang kan mga estudyante kaini makalihis na magpabisto soboot komo sarong ikos asin man nagpahiling nin kakaibang mga hiro kaini sa atubangan kan klase.
An Australian media pig iimbestigaran na an kaso kan nasambitan ng paratukdo sa Marsden State High School sa Logan City, Queensland, na kun saen pigsugo kaini an saiyang mga estudyante na apudon na sana ini komo “Ms. Purr”, asin soboot pig-aarog pa an pag ungol asin pag dila kan likod kan mga kamot na siring sa mga hayop na ikos.
Mahihiling sa mga ladawan kan dae na pinangaranan na high school teacher an sulot kaining headband na talinga kan ikos magin man an lanyard kaining igwa nin “purr”, na mas orog pang nagpalala pa sa kahaditan kan mga magurang na dae tama an nagin hiro kaini sa laog kan klase.
Sa kasagsagan kan dae pangkaraniwang iskandalo, nagluwas sa report kansuarin sana na pigpahimutikan kan Australian teacher an mga paratang soboot sa saiya asin pigsaysay na mawot kaining apudon na Miss Purr kan mga estudyante nin huli ta an saiyang initials ay P.R.R.
Sa saro pang follow up article napag araman man na dae na nagtatrabaho an paratukdo sa nasambitan ng eskwelahan.
