Aram baya nindo mga ka-bombo, sarong pekeng doktor na naggamit nin peke man na dokumentos an nagtrabaho komo Psychiatrist sa national healthcare system kan United Kingdom sa laog nin duwang dekada.
Binisto an babae na si Zholia Alemi gikan sa Iran alagad an saiyang pamilya an nag-migrate sa Auckland, New Zealand, kan 1990s.
Nabigo ini na maipasar an Bachelor of Medicine and Bachelor of Surgery degrees na-required tanganing makapagtrabaho komo kwalipikadong doktor.
Alagad an nasambitan ng babae an nagbalyo sa United Kingdom sa katahawaan kan 90s, asin ginibong adbentahe an legal loophole na nagtutugot sa Commonwealth doctors na mag-practise kan saindang inadalan maski mayong dugang na eksaminasyon.
Sa normal na proseso, an mga doktor na tinapos an saindang degrees sa ibang nasyon an kaipuhan na magkua nin Professional and Linguistic Assessments Board test, alagad si Alemi nagibong lampasana ini sa paagi kan pekeng mga dokumentos na ginibo sa UK.
Sa paagi kaini, haros 20 taon na nagtrabaho si Alemi komo Psychiatrist sa nasambitan ng nasyon.
Natapos an swerte kan nasambitan ng babae kan taong 2018, kan mapag-araman na guilty sa pamemeke kan will kan sarong 84-anyos tanganing mamana an harong na nagkakantedad nin nasa £300,000.
Sa ngunyan nakakulong na an babae asin kaipuhan na magbayad nin magkakanigong kantedad para sa saiyang iligal na gibuhon
