NAGA CITY- Kinua na kan saiyang pamilya an bangkay kan pigtutubudang miyembro kan rebeldeng New People’s Army (NPA) na nagadan sa nangyaring engkwentro sa Lagonoy, Camarines Sur kan Marso 12.
Sa entrevista kan Bombo Radyo Naga ki PC/Insp. Joselito Bermas, chief of police kan PNP Lagonoy, sinaysay kaini na nagpasiring sa saindang hepatura an sarong babae na hale pa sa Matnog, Sorsogon tanganing kuanon an bangkay kan nagadan na rebelde.
Positibo suboot na binisto kan babae na aki niya an rebelde asin binisto sa pangaran na Arden Napili, 25-anyos.
Mientrastanto, dae pa man nabibisto kan mga otoridad an saro pang bangkay na nadukayan harani sa pinangyarihan kan engkwentro sa barangay Pinamihagan sa nasambitang banwaan.
Sigon ki Bermas, naaagnas na an bangkay kan saro pang pigtutubudang miyembro kan rebeldeng NPA na nagadan makalihis an engkwentro kan madiskobre ini kan mga residente sa lugar.
Huli digdi, napiritan na an mga residente na ipalubong na an nadukayang bangkay.
Marurumduman na nangyari an engkwentro sa pag-ultanan kan mga soldados hale sa 83rd Infantry Batallion asin 30 armadong mga kalalakihan sa nasambitang lugar kan nakaaging Domingo, Marso 12.
Narekober sa pinangyarihan kan engkwentro an haralangkaw na kalibre nin badil, mga pampasabog asin subersibong mga dokomento.
