Pigkokonsidera ngunyan kan mga awtoridad an posibleng koneksyon kan suboot huma sa senado sa 18 indibidwal na nagpabisto na dating bodyguard kan dating Ako Bicol Party-list Representatives Zaldy Co, na dati nang konektado sa suboot kickback sa anomalya na flood control projects.
Sinabi ni Senate President Pro Tempore Sherwin Gatchalian na pigtatawan nin seryoso kan Senado an ano man na banta sa seguridad, asin tulos niyang pinagbotan an Opisina kan Senado Sergeant-at-Arms na makipagkoordinar sa manlaen-laen na ahensya nin paniktik tanganing ma-verify an impormasyon. Napag-araman na hale sa National Bureau of Investigation an nasambitang impormasyon, kun sain naglataw an posibilidad na posibleng magkawsa nin kariribokan sa senado an sarong armadong grupo.
Alagad, pigkwestyon ini ni Senador Alan Peter Cayetano pati na an timing kaini, urog na ta nakatalaan na magkaigwa nin hearing an Senate Blue Ribbon Committee na pamamayohan kan paksyon ni Cayetano.
Piglinaw ni Acting Senate President Gatchalian na dae naka-lockdown an Senado, alagad mantenidong mahigot an seguridad mantang piggigibo an verifications.
Mientrastanto, pigsierto kan Office of the Senate Sergeant-at-Arms na nakikoordinar sinda sa mga law enforcement agencies para maverify an suboot huma asin mamantenir an seguridad sa laog kan Senado.
