NAGA CITY- Nagpuon na an MDRRMO Milaor sa saindang preparasyon sa epekto kan naeeksperyensiyahan na pag-uran.
Sigun ki Tomas Villanueva III, Civil Defense kan MDRRMO Milaor pirme soboot sindang nag-aatisipar asin igwang nakalatag na kaplanuhan tanganing masierto na salbado an saindang mga nasasakupang residente sa panahon kan tag-uran.
Ini nin huli ta an banwaan nin Milaor an yaon sa hababang area na kun saen prone sa baha.
Dugang pa kan opisyal, sa may parte kan Poblacion, 13 na barangay digde an pigkokonsederar na low lying areas kun kaya kinaipuhan na pirmeng alerto.
Katakod digde, pagdagos an saindang pagbabandilyo siringman pagtatao nin impormasyon sa publiko kun ano an gigibuhon enkaso maglangkaw an lebel kan tubig.
Apwera digde, padagos man an pagbabantay sa mga spillway tuyong tag-uran orog na ta kadalasang nag-aapaw digde an tubig na peligroso sa mga tawo.
Igwa man trained na personahe an saindang banwaan para sa pagkundusir nin rescue operation enkaso kaipuhan asin sa panahon kan emerhensiya.
Mientrastanto, padagos soboot an saindang mga ginigibong lakdang tanganing madugangan an mga barangay sa saindang area na dae na pigbabaha tuyong nag-uuran.
Sa ngunyan, hagad na sana kaini an kooperasyon kan publiko para sa kasalbaduhan kan gabos sa panahon kan kasiributan.
