Tinutokan an saro sa pinakaimportanteng isyung pangsalud ngunyan sa Barangay Dinaga, Naga City, huli sa paglangkaw nin mga kaso nin hypertension orog na nhuli sa grabeng init nin panahon.
Sa intrevista kan Bombo Radyo Naga ki Tintin Intia, Barangay Kapitan kan Barangay Dinaga, Naga City, sinabi kaini na nagpapakol na sa tinatayang 35 degree Celsius an temperatura sa mga nakalihis na aldaw, na nagin rason tanganing mas pahigoton an mgalakdang para maprotektaran an salud kan mga residente.
Komo simbang, pig-asegurar kan barangay na igwang sapat na bilang nin mga health worker na nakaantabay tanganing magsagibo nin regular na blood pressure (BP) monitoring. Ginibo ini bako sana sa health center kundi pati man paagi sa house-to-house visits, lalo na sa mga senior citizen asin iba pang may halangkaw na blood pressure.
Igwa man nin sapat na suplay nin mga pangenot na bulong kontra hypertension. Alagad sakaling magkulang, dai magduwa-duwa an barangay na makipag-ugnayan sa City Health Office tanganing matugunan an pangangaipo. Para naman sa mga emerhensiya, an mga pasyente pig-rerefer sa pinakaharani na ospital.
Apwera sa hypertension, pingtatawan importansya kan barangay an paglikay sa mga Heat-Related Illnesses.
Pippagirumduman man an mga residente na likayan an pagluwas sa oras nin matinding sikat nin aldaw, lalo na an mga aki asin senior citizen. Hagad man an regular na pag-inom nin tubig tanganing malikayan an dehydration asin an paggamit nin payong o iba pang panangga sa init kun kinakaipuhan magluwas.
Aktibo man na ginagamit kan barangay an social media tanganing ipaabot an mga anunsyo asin warning hale sa City Disaster Office. Kaiba kaini, padagos an pag-ikot kan mga health worker tanganing pagirumdoman an mga residente na dai pagkaligtaan an pag-inom kan saindang maintenance medicines. Makipag-ugnayan sa mga health worker o makamati nin mga sintomas nin heat-related illness.
