Pigbomba kan barko kan China Coast Guard (CCG) nin water cannon asin ginitgitan an barko kan Bureau of Fisheries and Aquatic Resources (BFAR) sa may Pag-asa cay 2 o Sandy Cay sa West Philippine Sea kan Miyerkules, Mayo 21.
Sa sarong pahayag, pigkumpirmar kan BFAR na nagsasagibo an duwang barko kaini na BRP Datu Sanday asin BRP Datu Pagbuaya nin routine mission kaiba an sarong scientific team tanganing mangolektar nin sand samples sa lugar komo parte kan maritime scientific research initiative kan mangyari an panibagong panghaharass kan Chinese vessel.
Sigun sa ahensiya, duwang beses na binombahan nin water cannon asin ginitgitan kan CCG vessel 21559 an BRP Datu Sanday na nagresulta kan pirang danyos sa port bow asin smokestack kan barko kan Pilipinas kun saen nalaog sa alanganin na sitwasyon an buhay kan mga lunad na sibilyan.
Sigun pa sa BFAR na ini an enot na pagkakataon na naggamit nin water cannon an Chinese vessel kontra sa research vessel kan BFAR sa may Pag-asa cays.
Sa ibong kan agresibo, mapanganib asin iligal na aksiyon kan barko kan China, nagibo man na makumpleto kan scientific team kan Pilipinas an siandang misyon sa Pag-asa Cays 1,2 asin 3.
