Ipinaliwanag ni Public Prosecutor Fred Nojara an paggamit kan Battered Woman Syndrome (BWS) bilang legal na depensa para sa mga babaeng biktima nin pang-aabuso sa irarom kan Republic Act 9262 o an Anti-Violence Against Women and Their Children Act of 2004.
Sa intrevista kan Bombo Radyo Naga ki Prosecutor Fred Nojara,sinaysay kaini na susog sa Section 26 kan nasabing ley, an sarong babae na nagtitios nin helang na Battered Woman Syndrome dae pwedeng isasangat nin criminal asin civilly liable, kun mapatunayan an kinakaipuhan na kondisyon.
Ipinaliwanag man kaini na kun ginadan kan sarong babaeng biktima an saiyang abusadong agom mantang ini pigbubugbog o pig-aatake, pwedeng dai ini mapaninimbag sa kriminal asin sibil, sosog sa mga kahagadan kan ley.
Kabali sa mga kinakaipuhang patunayan an cycle of violence na igwa nin tolong yugto: tension-building phase, acute battering phase, asin loving o tranquil phase. Kinakaipuhan na mangyari nin duwang beses an siklong ini.
Lininaw man ni Nojara an pagkakaiba kan justifying asin exempting circumstances. Sa justifying circumstances, mayo nin criminal asin civil liability, mantang sa exempting circumstances, mayo nin criminal liability alagad posibleng igwa nin civil liability.
Mientrastanto, pigtukar man sa interview an posibleng epekto kan pagpasar kan Divorce Bill sa Pilipinas sa mga kaso nin domestic violence.
Segun ki Nojara, an diborsyo makakatabang sa mga mag-agom na may abusadong relasyon na makadulag. Alagad, dai kaini lubos na masosolusyunan an problema kundi makakabawas sana sa mga siring na kaso.
Pag-abot sa posibilidad na ma-legalize an divorce sa nasyon, sinabi ni Nojara na posibleng magin masakit ining ipasa huli sa impluwensya kan kultura asin relihiyon sa Pilipinas.
Alagad, ipinahayag kaini an saiyang personal na suporta para sa diborsyo, orog na sa mga mag-agom na haloy nang nagbubulag asin mayo nang posibilidad na magkabalikan, tanganing magkaigwa sinda nin pagkakataon na makapoon giraray.
Tinawan man nin duon ni Nojara an kahalagahan kan paggalang, pagkamoot, asin pagsabot kan mag-agom tanganing maibitaran an domestic violence.
Inabisuhan man kaini an mga nagdedesisyon na mag-agom na midbidon na marhay an saindang magigin agom bago magpundar nin pamilya.
