NAGA CITY- Nagbaba an pigrerespondehan na mga kaso kan vehicular accident kan BFP-Iriga sa saindang lugar.
Sa entrevista kan Bombo Radyo Naga ki SFO3 Peter Jade Bante, an tagapagtaram kan BFP-Iriga, sinaysay kaini na sa mga nakalihis na bulan nagbaba an mga kaso kan mga aksidente sa tinampo sa saindang banwaan na kun saen an saro sa mga pighihiling na rason an pagigin responsable kan mga road users.
Sigun ki Bante, nagigin salbado an pagbiyahe kan mga motorista gikan soboot sa saindang harong pasiring sa kasentruhan kan siyudad nin Iriga nin huli ta narealisar naman kan mga ini na kaipuhan maglikay tuyong nagmamaneho.
An mga siring na kaisipan an dakulang katabangan tanganing mapababa an mga indibidwal na binabawian nin buhay huli sa aksidente sa tinampo.
Sa ibong na lado, para man sa preparasyon sa maabot na kapaskuhan, nakatalaan na magsagibo nin pag-uurulay an BFP-Iriga katakod sa mga isasagibong inspeksyon sa mga lugar na magseserbeng designated areas para sa pagpapaputok.
Sa presente kaya, mayo pang pigpaluwas na abiso an lokal na gobierno kan Iriga dapit sa kun saen pwedeng magpaputok an saindang mga residentes.
Sa ngunyan, liwat na sanang nagpagirumdom an opisyal sa gabos na maglikay ngunyan na kapaskuhan asin mapuon soboot ini sa pagbakal nin standard na mga christmas decorations tanganing makalikay sa kasulo asin iba pang insidente.
