NAGA CITY – Makikipagtabangan an BFP Libmanan sa MDRRMO tanganing masierto an kasalbadohan kan mga turista orog na ta nagkapira sa mga resort an mayong permit.
Sa entrevista kan Bombo Radyo Naga ki SFO3 Jerome Agna Cariñp, OIC kan BFP Libmanan, sinaysay kaini na nagkaigwa sinda nin inspection sa mga Hotels, asin resorts.
Kun saen, pira sa mga resorts an nanutaran na mayo pa nin permit kun kaya saro ini sa saindang tatawan nin pansin orog na ta kadakol nin mga tawo nagpapasiring digdi.
Apwera pa digdi, imomonitor man ninda an mga eskwelahan na gagamiton nin precinct sa maabot nin midterm election.
Mientrastanto, nagpagirumdom man an opisyal sa publiko na enkaso magkakaigwa nin outing o mapasiring sa resort o dagat na siertohon na dae pigpapabayaan an saindang mga kaparientes orog na an mga kaakian.
