NAGA CITY – Nagheras nin mga paagi an BFP-Nabua kun pano makakalikay sa kasulo.
Sa entrevista kan Bombo Radyo Naga ki FINSP Jonathan Jaurigue Acting Municipal Fire Marshal, BFP-Nabua pigheras kaini na an Fire Extinguisher dakulang tabang tanganing makalikay sa kasulo orog na ngunyan na kapaskuhan.
Pigtawan duon man kaini na bako man mismong solusyon alagad ini maikokonsederar na first aid na kun saen mas mapaparekas an pagapula kan kalayo asin malikayan an danyos na pupwedeng iwalat kan kasulo kaya mas mainam man kun may sapat na kaaraman sa siring kaining bagay.
Paliwanag man ni Jaurigue na enkaso may kasulo halion sa pag-uugali an magpasiring sa CR dahil lang sa igwa digde nin access kan tubig huli ta an pinaka marhay na gibuhon enkaso dae kayang apulahon magdalagan nasana paluwas, huli ta mas importanteng masalbar an sadiri sa kun ano paman na gamit.
Dugang pa kaini na an ginigibo kan mga tawo na bucket relay sa oras kan kasulo mas marekas asin epektibo sa sarong komunidad na malikayan an paglala kan kasulo dahil sa pagbabayanihan kan mga residentes.
Katakod nagkakaigwa man nin programa an BFP para naman sa training kan bucket relay sa kada Barangay.
Sa ngunyan pagirumdom man kaini sa mga tawo na an kooperasyon kan gabos na tolos mag-apod sa mga BFP enkaso may magbungkaras na kasulo tanganing mas marekas makaabot asin masalbar tolos an mga kagamitan asin ngunyan na papaabuton an kapaskuhan ingatan an mga harong asin magin maingat sa pagbabakal kan mga dekorasyon.
