Nagpatanid an Bureau of Immigration (BI) sa publiko kontra sa mga online romance o love scam na naggagamit nin pangaran asin otoridad kan ahensiya tanganing lokohon an mga biktima asin hagadan nin kwarta.
Kasunod ini kan inireklamo kan sarong babae sa BI tanganing beripikahon an sarong email na soboot ipinadara kan sarong opisyal kan immigration katakod sa delivery kan sarong parcel gikan sa sarong nasyon.
Sigun sa BI, nakasaysay sa email na an package na ipinadara kan soboot dayuhang nobyo kan babae an “na-intercept” kan “Bureau of Immigration under the Ministry of Interior” asin kinakaipuhan na magbayad tanganing ini an mailuwas.
Maduon na pinahimutikan kan BI na gikan sa sainda an email message asin pighurot na ini an parte kan sarong love scam.
Nilinaw kan ahensiya na dae ini sakop kan anuman na “Ministry of Interior” asin mayo ining kapangyarihan na mag-ulang nin mga parcel, magproseso nin delivery, asin maningil para sa pagpapaluwas kan anuman na package.
An insidente an pig-endoros na sa Cybercrime Investigation and Coordinating Center (CICC) asin sa Cybercrime Division kan National Bureau of Investigation (NBI) para sa mas hararom na imbestigasyon.
Nakikipag-koordinar na man an BI sa iba pang ahensiya kan gobyerno tanganing masimbagan an mga kaparehas na panloloko.
Pig-enkaminar man kan ahensiya an publiko na magin mapanuri sa pakikipag-koordinar sa mga online acquaintance, orog na sa mga naghahagad nin kwarta o nagsasabing igwang ipinadarang package na nangangaipuhan nin bayad sa gobyerno.
