Nag-abot sa 2.50 milyon an bilang kan mga Pilipinong mayu nin trabaho kan bulan kan Mayo, matapos magsaka sa 4.8% an unemployment rate, segun sa Philippine Statistics Authority o PSA. Mas halangkaw ini kompara sa 3.9% kan kaparehong panahon kan nag-aging taon, kun sain 2.03 milyon pa sana an nairehistrong mayung trabaho. Mientrastanto, nagluya man sa 95.2% an employment rate, na katumbas kan 49.63 milyong mga Pilipinong may trabaho.
Segun pa sa May 2026 Labor Force Survey kan PSA, nag-abot sa 63.8% an labor force participation rate, na mas halangkaw kaysa 62.7% kan Abril, pero mas hamaba kaysa 65.8% kan Mayo 2025. Katumbas ini kan 52.13 milyong Pilipinong edad 15 anyos paitaas na yaon sa labor force, o an mga may trabaho asin an mga aktibong naghahanap nin trabaho.
Kadaklan sa mga empleyado iyo an mga wage and salary workers na nagrepresentar kan 64.3 porsyento kan kabuuang employed. Sa bilang na ini, 79.4% an nagtatrabaho sa pribadong sektor, mantang 14.2% an nasa gobyerno o government-owned and controlled corporations. Sinabi ni PSA Undersecretary Claire Dennis Mapa na dai pa nasusuri kun ano an magiging epekto kan ipinatupad na ₱85 wage increase sa National Capital Region.
Mientrastanto, nagbaba sa 12.2% an underemployment rate kan Mayo, hale sa 15.2% kan Abril. Katumbas ini kan 6.04 milyong empleyadong naghahanap pa nin dugang na oras sa trabaho, panibagong trabaho, o mas mahabang oras nin pagtrabaho tanganing madagdagan an saindang kita.
Sa sektor kan empleyo, an service sector pa rin an may pinakadakul na bilang kan mga trabahador sa 61.8%, sinundan kan agriculture sa 19.9% , asin industry sa 18.3%. Pinakadakul an nadugang na trabaho sa administrative and support services, mining and quarrying, health and social work, fishing and aquaculture, asin construction.
Alagad nagluya man an empleyo sa agriculture and forestry, iba pang service activities, public administration and defense, wholesale and retail trade, asin professional, scientific and technical activities.
