Inihayag ni Senator Francis “Kiko” Pangilinan na inayon kan Palasyo an kambal na panukalang batas sa agrikultura—an Agriculture and Fisheries Extension Act asin Agricultural Cooperatives Act—bilang mga priority bills na binibisto kan Legislative-Executive Development Advisory Council o LEDAC.
Nagpahayag nin pasasalamat si Pangilinan sa LEDAC, na binibilog kan duwang Kapulungan kan Kongreso asin kan Sangay kan Ehekutibo, sa pag-apilar kan duwang panukala na itinutulod kan Senado poon kan makabalik sa Senado.
Binanggit kan senador an kagyat na pangangaipohan na magtao sa mga paraoma asin parasira nin mas makusog na institutional support, mas marhay na access sa teknolohiya asin kaaraman, asin mas epektibong estruktura kan kooperatiba.
Obheto kan Senate Bill No. 1991, o an Agricultural and Fisheries Extension Services Act, na magkrear nin mas makusog asin mas episyenteng koordinasyon kan national extension system na magtao sa mga paraoma asin parasira nin napapanahong teknikal na tabang, research-based technologies, climate-smart farming practices, asin padagos na capacity-building.
Sa Senate Bill No. 1990, o an Agricultural Cooperatives Act, gigibuhon kaini an Bureau of Agriculture Cooperatives tanganing mapakusog an kapasidad kan mga paraoma asin parasira na mag-organisar asin makipagkompetensya nin epektibo.
Kun maiimplementar ini, mas mapapadali para sa mga agricultural cooperatives na makakua nin financing, markets, equipment asin value-adding opportunities.
Nagtutubod si Pangilinan na mahigot na magkaugnay an duwang panukala sa panghaluyan na programa para sa Food Security Agenda, huli ta kun igwa nin makusog na sektor kan agrikultura asin pangisdaan, makakatabang ini sa pagbaba kan presyo kan mga bilihin asin pagkakan, na mapakusog kan kapasidad kan ordinaryong consumer.
