Dae na bubukasan kan Commission on Elections (COMELEC) an pag-file kan Certificate of Candidacy (COC) para sa Barangay asin Sangguniang Kabataan Elections (BSKE) enkaso magin batas na an panukalang nagpapaliban kan halalan bago an Setyembre 28.
Segun ki COMELEC Chairman George Erwin Garcia, nakatalaan an pag-file kan COC puon Setyembre 28 hasta Oktubre 5 para sa eleksyon sa Nobyembre 2.
Kun magin batas ini pagkatapos na magpoon an pag-file kan COC, tulos na sususpendiron kan COMELEC an proseso.
Inako ni Garcia na nasa problema an COMELEC sa preparasyon para sa halalan huli ta dawa magin batas an postponemnet, pwede pa man giraray ining kuestionon sa Korte Suprema.
Sa ibong kaini, padagos an pag-andam kan COMELEC para sa pirilian sa Nobyembre 2 sagkod na mayo nin batas na nagpapaliban kaini.
Maabot na sa walong bilyon pesos an ginastos kan COMELEC para sa preparasyon kan BSKE.
Segun ki Garcia, madepende na sa Kongreso an pagdesisyon kun ipapadagos o ipagpaliban an eleksyon, mantang obligasyon kan COMELEC na ipaotob an batas.
Nangapudan man si Garcia sa publiko na dae basta-basta magtubod sa mga osipon na naglalakop online na kanselado na an Nobyembre 2 BSKE.
Saiyang sinabi na sagcod na mayo nin batas na nagpapaliban kan halaln, an Nobyembre 2 an magdadanay na aldaw nin eleksyon.
Kun naisabatas an panukala,lilipaton an masunod na BSKE sa ikaduwang Lunes kan Nobyembre 2028.
