KABTANG na kan Philippine coinage an Peñafrancia Festival tanganing bistuhon kan Bangko Sentral ng Pilipinas (BSP) an relihiyosong tradisyon kan Naga City sa ika-9 na coin kan 12-piece Pista sa Pilipinas commemorative series.
An 100-Piso coin, na ipinaluwas ngunian na bulan nin September, nakaukit an ritrato ni Our Lady of Peñafrancia sa sentro kan disenyo, kabali an mga simbolo na gikan sa mga tradisyon asin iconography kan pista.
Importante sa selebrasyon an traslacion, an pagbalyo kan imahe hale sa Our Lady of Peñafrancia Parish pasiring sa Naga Metropolitan Cathedral.Kabali man sa pista an fluvial procession, kun sain pinoprusisyon an imahe hale sa Naga Metropolitan Cathedral pasiring sa Our Lady of Peñafrancia Minor Basilica and National Shrine, na nag-aagi sa Naga River.An may kolor na parte kan barya nagpapahiling ki Our Lady of Peñafrancia.
An siyam na diamond-shaped na disenyo sa palibot nagrerepresentar sa bulan nin September.An outline kan imahe ni Our Lady of Peñafrancia manunutaran sa walang parte bilang simbolo kan commemorative coin kan Peñafrancia Festival.
An border kan coin may mga disenyo na inspirado kan mga dekorasyon na sulot ni Our Lady of Peñafrancia asin igwa man ining ethnic o banderitas na disenyo man sa panluwas na palibot.An Peñafrancia Festival icon manunutaran man sa likod kan barya kabali an iba pang mga simbolo kan kapiestahan.
Pareho an disenyo sa likod kan gabos na 12 coins sa serye.
Sigon sa BSP, an commemorative issueng ini parte kan saindang paghingoa na ipahiling asin pagtao nin importansya sa tradisyon asin pagtubod ki Ina kan mga Bicolano.
