Onseng taon nang deboto ni Inang Peñafrancia an sarong padre de pamilya kan syudad nin Naga.
Sa intrevista kan Bombo Radyo Naga ki Khikz Rosco Zulueta,sarong deboto ni Ina asin miembro kan Confradia de San Jose naging magayon asin tuninong an kakatapos pa sanang traslacion procession.
Sigon digdi, kadikit si mga debotong nakasarakat sa andas ni Inang Peñafrancia asin ni El Divino Rostro huli sa magayon na execution kan Confradia de San Jose na iyo an mga debotong nakabantay sa duwang andas tanganing malikayan na makasakat an nagkapirang deboto.
Sigon pa ki Zulueta, Setyembre 5,2026, primerong beses sa saiyang buhay na natawan ini nin pagkakataon na magtaram sa hampang kan ribo-ribong indibidwal tanganing iheras an milagrong saiyang naeksperienciahan.
Maogmang ipigheras ni Zulueta an saiyang naresibing milagro gikan ki ina na sa ibong kan madiklom na dalan na saiyang pinag-agihan sa buhay, igwa man giraray nin paglaom huli sa saiyang debosyon ki Inang Peñarancia.
Dagdag pa kaini na an saiyang debosyon sa presente bako nang para sa saiyang sadiri kundi para na sana sa saiyang pamilya asin para sa ibang tawo.
Labi an pagpapasalamat kaini sa Confradia de San Jose asin ki Inang Peñafrancia huli ta sa paagi kan saiyang debosyon, binago kaini an saiyang buhay asin an saiyang bilog na pagkatawo.
