NAGA CITY- Nagtitinir na pa man giraray an probinsiya kan Camarines Sur sa green category kun pag-uulayan an areas of concern kan Commission on Elections.
Sigun ki PCAPT. Liza Jane Alteza, tagapagtaram kan Camarines Sur Police Provincial Office, an mga naenot nang color coding kan Enero sa nagkapirang banwaan an nakabase sa mga nakalihis na eleksyon na igwang mga sightings kan mga rebelde alagad sa ngunyan, mayo pa man pagbabago asin nagtitinir na matuninong sa probinsiya.
Igwang mga nakukumpiskang badil siring na sana soboot sa buybust operation asin piggamit pa sa krimen alagad mayo man nasasabat sa COMELEC Check point
Marurumduman, nagmeeting an Commission on Elections asin Philippine National Police para matukoy an mga lugar sa nasyon na kinakaipuhang isairarom sa areas of concern.
Katakod kaini, mayo man nairerehistro na mga insidente na igwang kinaaraman sa eleksyon sa probinsiya kan Camarines Sur sa mga nakalihis na bulan alagad padagos man an saindang mahigot na pagbabantay orog na sa mga strategic na locations tanganing masierto na mayong maikurit na anuman na kariribukan na igwang kinaaraman sa eleksyon.
Sa ngunyan, hagad na sana ni Alteza an padagos na pakikipag-koordinar kan publiko tanganing magin matuninong an pagkundusir kan 2025 National asin Local Elections.
