Itinalaga na komo santo kasuodma, Domingo, Setyembre 7, 2025, si Carlo Acutis, sarong 15-anyos na italianong binatilyo na pigkonsiderar na “God’s influencer,” sa sarong canonization mass na pinangenotan ni Pope Leo XIV sa St. Peter’s Square, Vatican City.
Si Carlos, nagadan kan nakalihis na 2006 huli sa helang na leukemia. Bistado ini sa saiyang hararom na pananampalataya asin paggamit kan teknolohiya tanganing ipalakop an debosyon sa Eukaristiya.
Sa joven na edad, nakabilog ini nin website na nagdokumento nin labi 100 milagro katakod sa Eukaristiya.
Napag-araman na duwang milagro an binisto kan Simbahang Katolika na kinonektar ki Carlo, enot an pagrahay kan sarong aking Brazilian gikan sa rare pancreatic disorder, asin an himalang pagrahay kan sarong estudyanteng Costa Rican gikan sa matinding head injury makalihis ipagpangadyi sa puntod ni Carlo.
Sigun sa saiyang ina, si Carlo, sarong normal na aki na mahilig sa video games asin soccer, alagad may bukas na puso para sa Diyos.
Hinangaan man si Carlo huli sa saiyang pagigin bukas-palad asin pagigin deboto sa Simbahan puon kan aki pa ini.
Ibinugtak an saiyang lawas sa Assisi, Italy — istaran ni San Francisco kan Assisi kun saen ini an nakalubong na nakasulot nin jeans, sneakers, asin hoodie, siring kan saiyang pang-uro-aldaw na kasulotan.
Sinabing an canonization ni Carlos an simbag kan simbahan sa pangapodan kan makabagong kabanalan sa tahaw kan makabagong panahon, orog na para sa mga kajovenan.
