Aarangkada na naman an Nagoya Asian Games asin Paris Olympics double gold medalist, Carlos Yulo sa France kaiba an OAJLP Gymnastique team.
Ipinahayag kan OAJLP Gymnastique na mabalik giraray si Yulo sa saindang grupo para sa bagong season.
Ini an ikaduwang pagkakataon na mahihiling si Yulo kaiba an nasabing team.
Maroromdoman na parte si Yulo kan OAJLP Gymnastique na nakakua kan French Men’s Artistic Gymnastics Championship Top 12 title kan Mayo.
Hale si Yulo sa kampanya sa FIG Artistic Gymnastics World Championships na ginibo sa Rotterdam, Netherlands.
Mientrastanto, marhay na oportunidad an makasabay si Yulo sa OAJLP Gymnastique huli ta naghahanda ini para sa Olympic qualifying tournaments para sa 2028 Los Angeles Olympics sa California.
Saro sa pinaghahandaan ni Yulo an 2027 World Championships na gigibohon sa Chengdu, China na magsisirbing qualifying para sa LA Olympics.
Target ni Yulo na makakua nin tiket sa LA Olympics huli ta idedepensa niya an saiyang duwang korona sa floor exercise asin vault.
