Padagos an pagbisita kan mga turista asin residente sa Carolina City Lights sa ibong kan panahon nin tag-uran asin pagpuon kan klase huli sa magayon na tanawon asin matuninong na kapalibutan kaini.
Sa intrevista kan Bombo Radyo Naga ki Leoncio Libuit, Barangay Kapitan Carolina, Naga City, sinaysay kaini na katuyuhan kaini na mamantenir an kaayusan asin kalinigan kan saro sa mga mayor na destinasyon sa turismo kan ciudad.
Sa ngonian, 80% kan mga paratinda an mga residente kan Barangay Carolina, mantang an natatadang 20 por ciento mga bakong residente sa irarom kan superbisyon kan DOLE asin Metro PESO. Igwa nin plano na ibalyo an gabos na paratinda sa sarong terminal area sa masunod na tig-init sa pag-enact kan nanonongdan na ordinansa.
Parte man kan plano iyo an pagmukna nin sarong organisadong food court na may unipormeng disenyo nin mga tolda, kontroladong ilaw, asin pagbabawal sa mga makusog na sound system tanganing mamantenir an matoninong asin maogmang eksperyensya para sa mga bisita.
An ciudad igwa nin total na 10 ektarya nin daga para sa proyekto kun saen tulo sagkod apat na ektarya sana an piggagamit ngonian. An mga planong pasilidad kabali an sarong ampiteatro, resort sa tigsoli, oma nin burak, lugar para sa bisikleta, asin lugar nin pag-aling-aling bilang parte kan pag’uswag kaini bilang sarong eco-park.
Piglalaoman kan lokal na gobyerno an mas dakul na turista sa mga masunod na bulan. Huli kaini, prayoridad an pagpakarhay kan paradahan, pakusugon an seguridad, asin pagmantenir nin kalinigan tanganing magin ligtas, areglado, asin magayon na bisitahon an Carolina City Lights.
