Dumepensar an Catholic Bishops’ Conference of the Philippines (CBCP) ki Cardinal Luis Antonio Tagle katakod kan mga batikos kontra sa saiya dapit sa isyu kan sexual abuse kan clergy, pirang aldaw antes an conclave sa Vatican tangani magpili kan bagong Santo Papa.
Sa sarong pahayag na iniluwas kan nakalihis Mayo 2, pighurot kan CBCP na mayo nang direktang awtoridad si Tagle sa ano man na diocesan bishops sa Pilipinas magpuon kan italaga ini sa sarong posisyon sa Roman Curia.
Sigun pa sa sainda, an pagsimbag sa mga kasong pang-aabuso an responsibilidad kan mga lokal na obispo o religious superiors.
Binanggit man kan CBCP na nagtabang si Tagle sa pagbilog kan mga pastoral guidelines kontra sa sexual abuse kan nakalihis na 2003.
Siringpaman, sigun sa watchdog group na BishopAccountability.org, dae soboot ini mahihiling sa website kan CBCP o kan Archdiocese of Manila.
Binatikos kan co-director kan grupo na si Anne Barrett Doyle si Tagle asin saro pang papal frontrunner na si Cardinal Pietro Parolin, na dae malalaoman an mga ini sa pagsugpo kan mga pang-aabuso sa simbahan.
Pig apod pa ni Doyle si Parolin na sarong “consummate secret-keeper.” Mientrastanto, ikukundisir an papal conclave sa Mayo 7 kun saen pipilion an karibay ni Pope Francis, na nagtalikod sa edad na 88 kan nakalihis na bulan.
Kaiba sinda Tagle asin Parolin sa mga kinokonsiderar na pinakamakusog na kandidato tangani magin lider kan Simbahang Katolika.
